لا أعتقد التدوينة ستضيف جديد، اليوم كل الناس قررت تدي المجلس فوق دماغة. لكن ممكن تجاوب عن أسئلة ليك.

ليه؟ ليه الناس قررت تدي المجلس فوق دماغة؟ هم عاوزين فتنه بين الجيش والشعب؟ مش كفاية كده يا ثورجية ونشوف حالنا بقه ونسيب البلد للمجلس اللي حمى الثورة و كمان كام شهر في انتخابات ونختار اللي احنا عاوزينه والمجلس هايمشي؟

الحقيقة أنتهاكات الجيش تحت قيادة المجلس العسكرية أصبحت لاتحصر. من تكميم للأفوه الى انتهاكات مثل التعذيب وكشف على عذريات ناشطات الى محاكم عسكرية لمدنيين.

كله موثق مش أفترى على حد.

أيوه بس البلطجية أصبحوا بره كل بيت في كل شارع في كل زنقة، لازم يد من حديد، أحنا منهارين.

الشرطة قبل الثورة كانت قايمة بدور اليد من حديد ده، كانت بتعذب وتبتذ وتأخد رشاوي وتتاجر في المخدرات وكانت مافيا منظمة تماما ماسكة البلد ولو كنت عاوز تبلطج أو تعملك قرشين حرام يبقى الأحسن تعمل ده من خلالهم وبدون اخلال بالسلم العام علشان دي بلدهم. لكن دلوقت ما فيش الكلام ده (او لسه ما رجعش) فطبيعي أن الشوارع ما تكونش أمان زي الأول. (وللعلم في أسوء أيام الفراغ الأمني الشوارع كانت أمان عن جنوب أفريقيا)

رد فعل الجيش لكل ده رد فعل غريب جدا ومخيف، بدل ما يكون بيدرب الشرطة أو جايب لهم كورسات تعلمهم أزاي يشتغلوا شغل مباحث بجد ويحسن قدرات وحدات الأدلة الجنائية ويشوف النيابات والمحاكم عاوزه أيه علشان تقوم بدورها بأكمل وجه.. قرر يحل المشكلة بأيديه ولكن جه يكحلها عماها خالص، أصبح بيعتقل المئات بدون أدله عليهم واضحه، أي حد في مكان حدث معين بيتاخد، ويحطهم في عربياته ويبعت للنيابة العسكرية ولا السجن الحربي، كام يوم وتلاقي الممسوكين أتحكم عليهم بثلاث لسبع سنوات وأتصورا في التلفيزيون علشان يكونوا عبرة لكن من تسول له نفسه.

طيب وبعدين؟

مطلوب تحقيق في انتهاكات الجيش كلها، مطلوب اعادة محاكمة المدنيين.

طيب وعلى المستوى السياسي؟

مطلوب شفافية، عدم تقييد الاعلام القومي قبل الخاص، المشاركة في اصدار القوانين، التخلص من وجوه النظام السابق في المحافظات والوزارة، سيد مشعل بيعمل أيه في الوزارة وهو أصلا كان بيشتري أصوات ناخبين وليه صورة فضحته في الانتخابات اللي فاتت؟

أه أهم حاجة المجلس متهم فيها هي الأستهبال السياسي، عاوزين المجلس يبطل أستهبال.

مثلا يعني أيه تعيين ضباط أمن الدولة في جهاز الأمن الوطني؟

قانون منع الأضرابات؟ ياسلام!

أتهام النشطاء بالتخريب والوقيعة والأندساس والتلاعب بمقدرات الوطن والأصابع الخفية والكائنات الفضائية وكل ضلالات الشؤون المعنوية دي يستخدمها مع حد تاني. برافو بتعرفوا في الحرب النفسية، بس مش علينا أنا كنت فاكر ان الجيش بيحمى الثورة مش بيحاربها؟

وهرمنا من بلالين الأختبار، كل شوية بلونة تنطلق وتفرقع بعد كام ساعة. أه وورمنا من الفزاعات.

وبعدين الهبل بتاع مبارك نايم في مستشفى شرم الشيخ كأنها بلد أبوه.. يروح مستشفى السجن.

حاجة جانبية، أنا مش متضايق من بطئ المحاكمات. كده أحسن علشان نضمن أنهم قدمه كل الدفاع الممكن يقدموه وأن المحاكمات مكانتش أنتقام.

قانون الطوارئ؟

لازم نخلص منه ده قبل الانتخابات، هو والحظر. الخلايجة جايين في الصيف وبيحبوا يزقططوا في الشارع بالليل.

العربي بتاعك ضايع

عارف، وشكرا أنك قريت لحد هنا، فاضل حاجة بسيطة

أيه نظام مجلس رئاسي مدني؟

ﻷ، يا ريت الوضع ما يوصلش للدرجة، المجلس الحالي هانخلص منه بسرعة. أما لو الأنتخابات أتغير معادها يبقى نتكلم في ده. موضوع أنتخاب مجلس رئاسي مدني بيطول العملية الأنتقالية وأحنا مش ناقصين ممكن الحالي يخلصنا ويحقق مطالب الثورة ونخلص.

علشان نكون واضحين، الجيش قال 6 أشهر، لو الأمور محتاجة أطول من كده يبقى ننتخب مجلس مدني ويرجع ثكناته. لكن لو المجلس العسكري قرر يبطل أستهبال وخلص بسرعة طلباتنا هانديلة بنبوني وبرضه هانحقق في الفساد اللي في الجيش والأنتهاكات اللي تمت على فكرة يا طنطاوي.