تحية كبيرة كبيرة جدا لهبة عفيفي على ركوبها العجلة في القاهرة

هبة عفيفي قررت الصح وهو ركوب العجلة مش بس في الأجازة أو في المصيف ولكن في مشوارها للشغل في القاهرة. طبعا لأنها بنت فلازم المجتمع يفرض نظرته الغير منطقية تماما في رفض ركوب العجلة للسيدات، طبعا ده بيتم بالمعاكسات والمذهل أن هبة صورت تصرفات غاية في التفاهة والغباء من شباب بيحاول يدايقها في رحلتها. أتفرج على الفيديو من المصري اليوم.

بقالي 10 أشهر معتمد على العجلة في تنقلاتي و كوسيلة مواصلات أساسية في محيط 20 كم حوالين محل أقامتي. بجانب الإيجابيات اللي لا تحصي، من توفير و متعة وصحة الخ، لكن في مرات قليلة جدا في ناس تافهة بتغلس من باب أنهم فاضيين، أنا متخيل أن بالنسبة للسيدات ده بيتضاعف بشكل كبير جدا.

لأن هبة واثقة من نفسها و مش منتظره قبول المجتمع ليها فهي ممكن تنطلق على الدراجة وكل المعاكسات والمجتمع ككل هايكون وراها. لكن لازم ينضم اليها سيدات ورجال على عجل أكتر.

لو ما بتعرفش/بتعرفيش تسوق عجلة لازم تتعلم، مش صعب، ده المستقبل.