أيه أكثر دول عربية حاسة انها مستهدفة؟

كل يوم في الاعلام يطلع لنا حد أهبل يحاول يبث الرعب في نفوس الناس ويقولك مصر مستهدفة، الموضوع بيصل لمراحل من الهبل لدرجة ان يقال في مخطط لتقسيم مصر وأنها مؤامرة ماسونية صهيونية صليبية وعك كده. وده في الاعلام الرسمي والخاص يتم نشره ومن رجال دولة ودين وسياسة. عملت مقارنة بين الدول العربية المختلفة في الموضوع ده باستخدام محرك البحث جوجل علشان أعرف أنهي دول عندها البرانويا دي أكبر.

استخدمت محرك البحث جوجل لأنة الأكثر استخداما، وعملت بحث على جملة "مصر مستهدفة" مره وفي المرة الثانية "مصر مستهدف" وجمعتهم، لأن بعض الدول توصف بصيغة المؤنث واخرى بالمذكر ولضم أكثر عدد من الصفحات. استخدامت علامات التنصيص للحصول على تلك الجملة بالضبط وليست الكلمات في أي مكان في قلب النص، استبدلت كلمة مصر بالدول العربية الأخرى ودونت عدد الصفحات اسفل كل بحث. أيضا بحثت على أسم الدولة ودونت عدد الصفحات التي تذكرها وذلك للقيام بتسوية نتيجة البحث لتكون متناسبة مع حجم ذكر الدولة في الانترنت.

من الواضح من النتائج في الصور ان سورية أكثر بلد عربي بشكل كبير يصدر صفحات على الانترنت تذكر انها مستهدفة وبعدها مصر ثم لبنان.

بالنسبة لو عملت نفس الحاجة مع "مخطط تقسيم" النتائج بتكون ليها دعوه شوية بالواقع السياسي الجغرافي فالسودان انقسمت بالفعل واليمن انقسمت في الماضي والعراق كانت في أزمة طائفية طاحنة، لكن ما فيش معنى ان مصر تكون في القائمة دي أبدا. أخر مرة مصر كانت منقسمة كان من 7000 سنة أيام مينا موحد القطرين.

الرسومات البيانية دي مش معناها ان الدولة مستهدفة بجد لكن ده عدد الصفحات الانترنت اللي بتجيب سيرة الموضوع ده. طبعا ممكن تكون في صفحات معدودة بتنفي الكلام ده واتعدت علشان كده التدونية دي مش كلام علمي قوي بس محاولة تقريبية لقياس نسبة البارانوية لكل دولة. وأعتقد ان ممكن يكون في سبب مثلا لأن سورية شاعرة بأنها مستهدفة زي حديث جورج بوش انها ضمن دول محور الشر والعقوبات عليها. لكن أعتقد ان كتير من ده خوف وتضخيم للأمر مبالغ فيه هدفة التلاعب بالمشاعر، خاصة في الأوقات الثورية الحالية. على الأقل في موضوع مصر.

باسم يوسف في حلقة ممتازة بيشرح أكثر موضوع مخطط تقسيم مصر ده و نظرية المؤامرة اللي الأعلام عمال يروج ليها بدون أي دليل بهدف الذعر واتهام أشخاص أو جمعيات بالعمالة.

الجدول ده في النتائج بالتفصيل لو عاوز تلعب بيها.