واحدة من طرق التأقلم مع الاحساس بالانفصال عن المكان ال عشت فيه طول حياتي بسبب تسارع الانجازات والتطور الأسمنتي الأسفلتي والتوسع في حارات الطرق وتغلغل الكباري على حساب الحدائق والبلكونات هي محاولاتي في التغلب على الشعور بالعجز أمام كل ده بلعب نوع معين من ألعاب الفيديو بسميه ألعاب الإنجازات (الأسم الدارج هو ألعاب المحاكاة).

بولي بريدج

أول لعبة في سلسلة ألعاب الإنجازات هي لعبة بناء الكباري وهي لعبة محاكاة وبازل في نفس الوقت وهدف اللعبة بناء كوبري لتعدية عدد من السيارات من نقطة إلى نقطة ثانية فوق نهر بإستخدام مواد مختلفة كالأخشاب والصلب والحبال. بعد البداية البسيطة اللعبة بتتحداك أنك تبني جسور متينة كفاية وبتكلفة محددة (نقطة غير واقعية في اللعبة). كمان التضاريس بتتغير وبتزيد من حجم أو تعقيد الكوبري.

اللعبة متاحة عن طريق ستيم على ويندوز وماك ولينكس ونينتندو سويتش وعلى الأيفون والأندرويد.

أوبن تي تي دي

لعبة حرة/مفتوحة المصدر ومتاحة بالمجان على أغلب أنظمة التشغيل وهي تقليد للعبة قديمة أسمها ترانسبورت تايكون ديلوكس.

هنا أنت بتدير شركة مواصلات والهدف هو تخطيط وإنشاء شبكة قطارات وطرق وأتوبيسات تخدم الصناعات والمدن المختلفة في الخريطة وبالتالي إيرادات الشركة بتزيد وده بيساعد في نمو الشبكة أو تطويرها على مر السنوات (الزمن في ألعاب المحاكاه أسرع من الزمن في الواقع) وطبعا بتبدأ بميزانية محدودة ويمكن الإقتراض من البنك، لكن الغير واقعي في اللعبة كذا حاجة: واحد أن القروض لها حد أقصى، أتنين أنك ما ينفعش تبني مونوريل وأنت لسه عندك قطارات ديزل بس، لازم تمر بتطور تكنولوجي متسلسل من الفحم للديزل للكهرباء ثم المونوريل والماجليف، ثالثاً أنك ممكن ما تعرفش تبني محطات لو أهل المدينة زعلانين منك علشان بتعمل إنشاءات كتير مرة واحدة وطريقة إرضائهم في اللعبة هي أنك تزرع شجر كتير حوالين بيوتهم!

اللطيف جدا هو التفاصيل الصغيرة والمعقدة في تصميم وبناء شبكات القطارات واللعبة أشبه بالنسخة الاكترونية من هواية القطارات المصغرة، فلازم ترسم خطوط طرق منطقية وتحط سيمافورات في الاتجاهات الصح بحيث تحسن من سرعة القطارات والتقاطر وتمنع الحوادث بين القطارات.

سيتيز: سكايلاينز

من أشهر ألعاب بناء المدن حالياً، النوع ده بدأ بلعبة شهيرة أسمها سيم سيتيز نزلت في التسعينيات ويمكن سمعتوا عنها وفيها أنت بتكون المخطط والقائد الأساسي في عملية بناء وإدارة مدينة جديدة ومهمتك هي رسم الطرق وتخصيص الأراضي وإنشاء البنية التحتية وتشحيع المدينة على النمو وحل المشاكل كالزحام والتلوث وتحسين التعليم والصحة وإيجاد فرص عمل للمواطنين و على عكس الواقع لازم تعمل كل ده في حدود الميزانية المحددة لك وبإيرادات الضرائب.

سيتيز: سكايلاينز نزلت في 2015 على كل نظم التشغيل بما في ذلك لينكس ونجحت نجاح كبير، وبالنسبة لي كمية التفاصيل وجودة الرسومات مبهرة جداً (الصور هنا على المدونة صغيرة وألونها محدودة لتقليل تكلفة استضافة الموقع)، اللعبة نزل لها إضافات كتيرة لأنواع وطرازات مختلفة من المباني أو السيناريوهات (كالكوارث). بالإضافة إلى مجتمع نشط من اللاعبين بيطوروا تعديلات عليها و خرائط مختلفة. وطبعاً فيه كل الفيديواهات المسلية على يوتيوب لناس بيبنوا مدن عجيبة أو شبيهة لمدن حقيقية أو مخطط لها(مثلاً نيوم).

العيب الوحيد في سيتيز: سكايلاينز أنها بتستهلك كمية كبيرة جدا من الرامات لما المدينة بتكبر، أنا مركب 24 جيجا رام والحقيقة الجهاز بيعاني لكن بعد عدد غير قليل من ساعات الهروب من الواقع.

أنا مش متأكد ليه أنا اليومين دول منجذب للنوع ده من الألعاب، يمكن أختيارنا لألعاب معينة بيساعدنا على فهم أحداث في الواقع؟ أو محاولة للسيطرة على الإحساس بفقدان المألوف؟ أو الشعور بالراحة لأنك داخل اللعبة بيرجع لك الأحساس بالقدرة على التأثير على حياتك؟ على أي حال أتمنى تسلية ووقت ممتع لكل حد يجرب أي من اللعب ال ذكرتها.