لأ مش الزغزغة لكن رياضة الويندسرفينج أو لألواح الشراعية أو الركمجة الشراعية أو الشراع أو التزلج الشراعي (للأسف ما فيش أتفاق على الأسم بالعربي¹)، هالتزم بالويندسرفنج لأن ده الأسم ال بأستعملة والمستخدم ما بين معارفي والأقرب ليا لما بفكر فيها، ذكرت قبل كدة الرياضة دي هنا في 2005 و2006، هدفي من كتابة التدوينة دي النهاردة هو أني أكتب كل حاجة أعرفها عنها لأنها رجعت تاخد مكان كبير في وجداني.

أنا بدأتها لما عرفت أن أخو صديق ليا بيعرف يلعبها وكنا في مدينة دهب بجنوب سيناء (من ذهب الوقت وليس المعدن) وأخدت ساعة تعليمية كده على الشط، كان من زمان نفسي أتعلم ألعبها، أول مرة شفتها خالص عمي كان عنده لوح وشراع وكان بينزل يلعب في فايد وأنا عندي 6 أو 7 سنوات.

المهم بعد تجربة دهب أنا رجعت القاهرة وزي ال بيجرب المخدرات لأول مرة اللهفة لجرعة تانية كانت شديدة جداً لكن السفر لدهب تاني مش سهل، وقتها كنا في سنة الأمتياز في كلية الطب، عرفنا أن ممكن الواحد ياخد دورات تدريبية في نادي الكشافة البحري على نهر النيل في الجيزة وفعلاً أخدنا كورس، نخلص شغل في المستشفى وبعدين نروح ننزل في النيل.

والحقيقة أنا لما بفتكر الفترة دي بحس بلأمتنان الشديد لصديقي إيهاب² لأنه بعد ما فتح الباب، شجعنا على أننا نتعلم لأن هو كمان أتفتن بيها وسافرنا مع بعض كذا مرة.

ساعتها ناس كتير كانت بتسأل لو خطر نزول المياة في النيل ولو هايجلنا بلهرسيا، بعد 18 سنة أقدر أقول أن لأ ما جلناش بلهرسيا أو أي أمراض تانية من النيل. بعد كده أشتريت عدتي الخاصة (مستعملة لأن مافيش حد بيبيع جديد وكده كده الجديد غالي جداً، العدة المستعملة بتبقى في حدود 1000 دولار)، وبقينا بناخد العدة على العربية ونطلع رأس سدر أو دهب، لحد ما أنشغلت جداً في سنوات النيابة والدراسة وبعدين جت الثورة إلخ..

الأسبوع ال فات سافرت سيناء مع عالية وقعدنا في كاترين كام يوم وبعدين رحنا دهب وهناك أنا أجرت عدّة ونزلت وعالية أخدت ساعتين كورس من مدرب.

أنا على الويندسرف سنة 2006

دي كانت أول مرة أنزل من أكتر من 12 سنة وكأن السنوات دي كلها مكانتش وأستعدت بشكل تلقائي³ توازني على ركوب اللوح لكن طبعاً بسبب قلة لعبي للرياضة ونسياني لبعض التفاصيل سيطرتي على اللوح والشراع كانت متواضعة. بس الأهم أن الإحساس جري في دمي مرة تانية مع أول لحظات الانزلاق على سطح المياة!

الانزلاق بيحصل لما قوة الرياح بتبقى كافية لدفع الشراع بقوة ترفع اللوح من المياة والقوة دي تخلي اللوح يتزحلق على سطحها⁴. الانزلاق هو الأحساس ال بيخلي ناس كتير تدمن الويندسرفينج، السرعة والأحساس بقوةالشراع والرياح وصوت اللوح وهو بيعمل تشوب تشوب تشوب على سطح المياة كل ده وانت على بعد سنتيمترات محدودة من سطح البحر.. أحساس ممتع بتبقى عاوز ترجع له للأبد وتعويض جميل لكل مرات الوقوع ال بتتعرض لها أثناء تدريبك ولعبك.

تقريباً مافيش رياضة تانية بتكون علاقة حميمية بالشكل ده مع الرياح والمياة لأن جسمك بيتحول الى جزء من ميكانزم الركمجة بالشراع، في الملاحة بالقوارب الشراعية فيه دفه بتغير أتجاه القارب لكن هنا مكان الشراع وزاوية ميله هي ال بتغير أتجاه اللوح وجسمك ودرعاتك هما ال بيتحكموا في كل ده.

واحدة من المفاهيم الخاطئة حوالين الرياضة دي أنها محتاجة عضلات قوية، والحقيقة لأ لأنها بتعتمد أكتر على التوازن وبراعتك في تحريك جسمك على اللوح. ودي حاجة من الحاجات ال أنا نسيتها في النزولة الأولى من أسبوع وهي أن مهما أنا كنت قوي الرياح غالباً هاتكون أقوى وأن مافيش جدوى من أني أحاول أجبر الشراع على حركة ما بعنف أو بقوة وحتى لو قدرت في الأول نفسي هايخلص بسرعة وأتعب.

الزِن والوعي التام

صورة من Alles Photos (cc: by-nc-sa)

الوعي التام هي طريقة للتأمل مصدرها ديانات الشرق الأقصى مثل البوذية والهندوسية وممارسة الوعي التام بتحصل عن طريق التركيز الكامل على اللحظة الحالية وبدون الحكم أو تقييم تلك اللحظة، أحدى طرق ممارسة الوعي التام هي الجلوس في مكان مريح والأنتباه للتنفس بدون التحكم فيه فقط متابعته وملاحظة إيقاعه وفي بعض الأحاين ذهنك بيشرد لأفكار مختلفة وهنا بتلاحظ أن الذهن شرد وتتقبل الأفكار بدون حكم عليها، طريقة تانية هي التركيز على مشاعر مختلفة في الجسم أو التركيز على الأصوات والروائح والأحاسيس.

في نفس الوقت ال ظهرت فيه رياضة الويندسرف، ظهر أهمية النوع ده من التفكير في العلاج النفسي، وأصبح الوعي التام جزء أساسي من بعض العلاجات النفسية كالعلاج الجدلي السلوكي أو كطريقة لتقليل الشعور بالقلق والتوتر.

كذلك في رياضة الشراع من المستحيل التفكير في أي شيئ غير الانتباه للحظة الحالية، كل تركيزك مع الهواء وحركات جسمك ومكان الشراع واللوح، أي هموم أو مشاكل بتختفي من عقلك، تصفيه تامة للذهن من كل ما هو خارج المياة. أي تفكير في أي شيئ غير مهم للحظة الحالية بينتهي بالوقوع في المياة فوراً.

يمكن في وقت سنة الأمتياز كنت محتاج القدرة دي على تصفية ذهني من مخاوف المجهول بخصوص الحياة المهنية والمستقبل لخريج جديد، ويمكن أختفاء المشاكل من العقل لفترة بيساعد في الوصول لحلول أو أجابات.الزن بيخليك تشوف الحاجات كما هي مش زي ما عقلك رسمها لك.

الزن والوعي التام في الويندسرفينج مش مفيد بس مع مشاكل الحياة خارج البحر، لكن كمان في تعلم اللعبة. بيحصل أن بعض الحركات بتبقى صعبة ومش عارف تعملها وهنا محتاج تركز على مشاعرك وتثق في أحاسيسك وأنت بتلعب، ساعات كمان ممكن تحتاج تبعد عن الحركة دي شوية وتلعب حاجات تانية وترجع لها في وقت تاني.

تاريخ الرياضة

أس نيومان داربي 1963

صورة لفسيفساء فيها إيروت (إله إغريقي صغير بأجنحة) يقف على أمفورة وماسك شراع

أول مرة حد يحط شراع على لوح ويحاول يبحر بيه كان أس نيومان داربي سنة 1963 و الشراع والشخص بيبقى عامل زي ما يكون مصلوب وهو بيمشي على المياة. بس أكيد مش أول واحد يجرب أو حتى يحلم بحاجة زي كده والدليل الإيروت ال راكب الأمفورة وماسك شراع في الجدارية الفسيفساء في لبدة الكبرى بليبيا.

لكن الويندسرفينج بشكلة الحالي هو اختراع جيم دريك مهندس طيران، دريك صمم وصنع أول لوح وشراع في الجراج بتاعه في كاليفورنيا سنة 1967، ممكن تتفرج على أول مرة يستخدمها ويعلم نفسه يركبها.

الرياضة أنتشرت ببطء في أمريكا لكن أول ما وصلت أوروبا أنتشرت بسرعة جداً في السبعينيات وظهرت بعد كده على أي شاطئ حوالين العالم فيه رياح قوية فترة كبيرة من السنة وفي 1984 دخلت رسمي كرياضة أولومبية.

أول مركز للويندسرفنج ظهر في دهب هو Surf & Action Center سنة 1995 على شاطئ فندق نوفوتل في اللاجونة وأسسه إلكة شلمباخ وفيكتور فيستنبرج بعد رحلة استكشافية في المنطقة لأماكن ويندسرفنج جديدة سنة 1994، في سنة 1999 هاري ناس أستحوذ على المركز بعد ما إلكة وفيكتور رجعوا ألمانيا لأسباب عائلية ولسه مركز هاري ناس موجود لحد دلوقتي.

منطقة الويندسرفنج في دهب مميزة جداً لأنها أغلب السنة الرياح بدرجة 4 على مقياس بوفورت ⁵ وممكن تصل لـ8، الرياح في دهب قوية بفعل الجبال في سيناء والسعودية على شرق وغرب خليج العقبة بيعملوا نفق بيزود من سرعة الرياح، وطبعاً بالمقارنة بأماكن تانية في العالم فالمياة دافية طول السنة.

منطقة الويندسرفنج في دهب متقسمة لتلات مناطق:

1. لاجونة: منطقة آمان وممتازة للمبتدئين وسهل أنك تتعلم فيها.
2. سبيدي: منطقة خلابة والمياه فيها فيروزية وكمان مافيش فيها موج خالص بالرغم من الرياح القوية ممتازة للأنطلاق بسرعات عالية.
3. الكاميكازي: الرياح قوية جداً والأمواج هنا بتوصل لـ 2 متر وهي بعد منطقة من الشعاب المرجانية أسمها نابليون، مناسبة للمحترفين وينصح بعدم النزول هناك من غير 2 مرافقين، هنا بتكون قريب من منتصف خليج العقبة.

أجزاء اللوح والشراع

الرسمة من كتاب Windsurfing: Basic and Funboard Techniques من تأليف روجر جونز، الكتاب نُشر في 1985 وبعض الأجزاء ما بقتش موجودة في الموديلات الحديثة.

الأسماء العربي بعضها من كتب عن الابحار بالشراع بالعربي وبعضها من اجتهادي، ولكن فعلياً أغلب المسطلحات الأنجليزية هي ال بتستخدم.

1. Nose - قوس
2. Tail - مؤخرة
3. Fin - زعنفة
4. Centerboard - سكينة
5. Footstrap - رباط القدم
6. Mastfoot well - مكان تركيب قدم الصاري
7. Mast - صاري
8. Boom - مقبض
9. Mastfoot and universal joint - قدم الصاري والوصلة المفصلية
10. Sail Clew - زاوية الشراع
11. Outhaul - حبل التحكم في شدد زاوية الشراع
12. Boom front end - مقدمة المقبض
13. Inhaul - حبل المقبض
14. Uphaul - حبل رافع
15. Shock-cord - حبل مطاطي
16. Downhaul - منكاس
17. Safety cord - حبل الأمان
18. Battens - عوارض
19. Leech of sail - حافة الشراع
20. Foot of sail - قاعدة الشراع
21. Luff of sail - الجهة المعرضة للريح أو حافة الشراع الأمامية
22. Mast sleeve - كم الصاري
23. Head of sail - رأس الشراع
24. Tack of sail - ركن الشراع الأمامي

إجراءات السلامة

الأمان أهم حاجة ودي من الحاجات ال مهم تتعلمها الأول خصوصاً طلب المساعدة وانت في وسط البحر ومش عارف ترجع. أنا حصل لي مشكلتين وأنا بلعب، أول مرة الصاري كان قديم جداً وأتكسر وأنا في وسط النيل ولأنه عهده خفت عليه وفضلت ماسك فيه هو والشراع والتيار أخدني بعيد عن النادي، اللنش بتاع النادي جه بعد شوية أخدني بس ما كنتش تجربة لطيفة والكابتن قالي وقتها أني كان المفروض أسيب الشراع والصاري وأهتم بحياتي أنا مش بالعهدة. تاني مرة كنت في رأس سدر ونطيت من على الموج وأنا ماشي بسرعة لكن ما كنتش منتبه أن فيه عامود حديد في وسط البحر وخبطت فيه، أنا ما حصليش حاجة بس الصاري أتكسر.

• ما تنزلش بعيد لدرجة أنك ما تشفش الشاطئ، لو مش شايف الشاطئ إنقاذك هايكون صعب
• كمبتدئ أنزل البعد ال تعرف ترجعه عوم
• اللوح هو قارب نجاتك ما تعومش بعيد عنه
• لو تعبت أو حصلت لك مشكلة أقعد على اللوح وشوح بدرعاتك
• خليك واعي بالأشياء والقوارب ال حواليك لو عاوز تقف بسرعة أترك الشراع يقع في المياة
• لبس سترة نجاه أو مساعد للطفوية مش ضروري لكن مفيد في المياة العذبة
• لبس خوذة غير ضروري لأن خبط الرأس نادر جداً وبيحصل أكتر مع الفويلنج عن الويندسرفنج. وانت بتقع أفضل ماسك في المقبض علشان تعرف تطلع من تحت الشراع بسرعة و تتجنب أنك تخبض رأسك.
• بعد يوم هاتكتشف شوية كدمات وخرابيش بسيطة على رجلك ودراعاتك من الطلوع على اللوح بس مش هاتحس بيهم أصلاً
• التأكد من العدة سليمة ومتركبة كويس
• أنتبه لمصدر الرياح وأتجاهها لو قادمة من الشاطئ، الرياح ممكن تسوحك بعيد وما تعرفش ترجع.
• الشاطئ بيكون فيه أماكن مخصصة للعوم أعرف الأماكن دي فين وأبعد عنها علشان ماتخبطش حد.

الإبحار بالويندسرف

البداية

الطلوع على اللوح والأمساك بالشراع هي أول خطوة، بتقف على اللوح وتشد الشراع من المياة بأستخدام الحبل الرافع (وهنا الأفضل أنك تستخدم وزنك في رفعة مش عضلاتك علشان ما تتعبش بسرعة)، وفيه البداية من الشاطئ (beach start) وهي طريقة سهل تتعلمها وهي أنك تمسك بالشراع في زاوية معينة من الريح وفي المياة الضحلة تقف على اللوح، بعد فترة ممكن تتعلم البداية من المياة (water start) وهي مفيدة جداً في تقليل المجهود لأنك بتكون في وسط المياة الغريقة وبتظبط الشراع بزاوية تخليه يعبي هواء ويرفعك لفوق علشان تعرف تقف على اللوح، وهنا بتقوم قافلة ومنطلق بسرعة، البداية من المياة عرفت أعملها زمان كذا مرة لكن ما عرفتش خالص اليومين دول.

الشراع زي الجناح مع الهواء بيخلق قوة رافعة، العدة مصممة على أنها تحول القوة دي لقوة تدفعك للأمام. الزعنفة (و السكينة) عاملين زي الجناح برضو لكن دورهم أنهم يخلوك تعرف توجه اللوح في أتجاهات مختلفة مش بس نزولاً مع أتجاه الريح (downwind) وكمان بيساعدوا على مشي عكس اتجاه الريح (upwind).

في الابحار بالشراع في العموم في دائرة بتشرح الأتجاهات المتاحة لك، فيه منطقة محظورة وهي المنطقة ال بيجي منها الرياح (أو عين الريح)، مستحيل المشي في الاتجاه ده لأن الشراع بيرفرف زي العلم وبيكون عديم الفاعلية وده معناه أنك علشان تمشي عكس أتجاه الريح لازم تمشي في خط متعرج. علشان تمشي في خط متعرج لازم تعرف تغير من أتجاهك، تغيير الأتجاهات بيكون بالدفة في المراكب الشراعية لكن في الويندسرفنج مافيش دفة، توازن الشراع على اللوح هو ال بيخليك تغير الأتجاه، لو الشراع مال للأمام اللوح بيدخل مع أتجاه الريح (downwind) لو اللوح مال للخلف بيدخل عكس أتجاه الريح (upwind).

الأتجاهات المتاحة:

• الوقوف في عين الريح
• عكس اتجاه الريح Close hauled: مهم تعرف تمشي في الاتجاه ده علشان تعرف ترجع
• الوصول Reach: أسرع أتجاه وهنا الشراع عمودي على اتجاه الرياح
• مع اتجاه الريح Downwind
• أمام الريح Run: وهنا على عكس المتوقع فسرعتك أقل من سرعة الوصول لأن الشراع بيدفعك للأمام وبيشتغل ضد الاتجاه ده في نفس الوقت.

مناورات تغيير الاتجاه:

هنا أنا بوصف المناورتين الأساسيتين في الويندسرفنج، محتاجين ممارسة كتيرة وفي ظروف مختلفة، في الأول بلوح كبير ورياح بسيطة، كمان فيه فيديوهات كتيرة على يوتيوب بتشرح المناورات دي.

التاك (التجوال أو الهجوم على الريح؟) Tack

التاك هو الدوران ضد الرياح (لو نظرت لرسمة الأتجاهات ال فوق فأنت بتلف في النص ال فوق منها)، وبيتلخص في انك بتبحر عكس اتجاه الريح لحد ما اللوح يلف لبعد الناحية ال قادم منها الريح ولما ده يحصل أنت بتلف جسمك من أمام الصاري علشان تقف على الناحية التانية من اللوح، والخطوات كالآتي:

1. بص حواليك وتأكد أن مافيش حاجة أو حد تخبط فيها
2. حرك ذراعك الأمامي بالقرب من الصاري وحرك قدمك الأمامية أمام قدم الصاري.
3. بص على الناحية ال جاي منها الريح ووجه جسمك ناحيتها، وميل الشراع للخلف كان فيه حاجة على الماية أنت عاوز تخبطها بزاوية الشراع.
4. اللوح هايلف ويدخل على عين الرياح، هنا أنت في خطوة واحدة بتنقل جسمك للناحية التانية من اللوح وبتمسك في الناحية التانية من المقبض.
5. ميل الشراع للأمام علشان تنحرف في اتجاه الرياح.

فيه تنويعات على التاك زي التاك السريعة (fast tack) والتاك القرفصاء (duck tack) لكن كلها ممكن تتمرن عليها بعد تعلم التاك الأساسية وإتقانها.

الجايب (الطواف) Gybe or Jibe

هنا الدوران بيكون مع أتجاه الرياح (بتلف في النص ال تحت من رسمة الأتجاهات):

1. وأنت ماشي وصول بترجع اليد الخلفية لورا أكتر على المقبض وبتميل الشراع للأمام.
2. واللوح بيلف مع اتجاه الرياح بتحط القدم الأمامي خلف الرجل الخلفية وبتحط عليها كل وزنك.
3. استمر في استمالة الشراع للأمام ناحية المياة
4. اللوح بيبدأ يعدي من منطقة أمام الريح وبيتجه للأتجاه التاني وزاوية الشراع هي ال في المقدمة
5. أترك اليد ال ناحية زاوية الشراع وحرك قدمك للأمام قريب من الصاري والقدم التانية بتكون على بعد بسيط من الأمامية

زي التاك الجايب محتاج ممارسة كتير وفيه تنويعات للرياح القوية زي الجايب أثناء الأنزلاق (carve gybe).

لو عملت جايب وبعدين تاك أو تاك وبعدين جايب ورا بعض هاتكون لفيت دائرة كاملة.

في بداية تعلمك للعبة هاتحتاج تجرب الشراع على الشط وتعرف أزاي تحركه بدرعاتك وتتحرك على اللوح، أول ما هاتنزل اللوح بيكون كبير علشان التوازن في الأول صعب ومع الممارسة هاتلاقي أنك هاتعرف تنزل بألواح أصغر، كمان في الأول النزول في رياح بسيطة وبشراع صغير لأن الهدف تعلم أزاي تمشي في أتجاه صحيح وطرق تغيير الأتجاه.

تركيب العدة صعب في الأول ومراكز الويندسرفنج لما بتأجر لك هي المسؤولة أنها تعمل ده وممكن تطلب مساعدة عادي لأن لازم عدتك تبقى راكبة صح وبإحكام، لما يجي الوقت أنك تشتري عدتك هاتكون أتعلمت تركبها كويس.

ليه الويندسرفنج؟

تمثال الويندسرفنج في دهب من أوائل الأعمال الخرائية6 (2005)

نفس التمثال بعد ما الرياح دمرته (2023)

ناس ممكن تقول على الويندسرفنح أنها رياضة ميتة (شعبيتها قلت عن زمان خصوصاً بعد ما ظهر الكايت سرفنح) ورياضة متاحة بس لناس معاها فلوس كتير أو أجانب وكمان صعبة وما حدش مهتم أو هايهتم بيها وكمان أن من الأفضل تجربة رياضات مائية تانية زي الجت سكي أو لانشات أو مراكب الشراع العادية أو التجديف وكلها رياضات مرتبطة بالمياة أو الهواء بشكل كبير و يمكن في فرص أكتر لتعلمها وممارستها، ليه لازم دي يعني؟

أنا ردي هو أن الويندسرف له خصائصة الخاصة، المتعة عليه مختلفة تماماً.

على عكس اللنشات والجت سكي و إلخ.. ما فيش احتياج للبنزين، ما فيش دوشة وتلوث للبيئة (شوف مثلاً مهرجان الضوضاء والتلوث في بحيرات مارينا العالمين في الساحل الشمالي في الصيف) على المستوى الشخصي ده بيزود تعلقي باللعبة وشعوري بأهمية الشراع في القرب من الطبيعة والبعد عن انبعاثات الكربون في الجو⁷ للممارسة الرياضة والاستمتاع، في رأس سدر ممكن الدرافيل تجري جنبك وأنت بتنزلق بسرعة على سطح المياة!

لو معاك فلوس، الويندسرف ممكن ياخدك لأماكن كتيرة في العالم لأن فيه سواحل وشواطئ خلابة ينفع تلعب فيها في أماكن كتيرة ولو ما معكش ينفع تلعب برضو في النيل أو في سيناء وممكن عن طريق تكوين معارف في اللعبة تأجر عدة بأسعار قليلة وحتى مع الوقت ممكن تشتري عده مستعملة مش غالية.

الويندسرف هايأخذك لمستوى جديد من الثقة بالنفس، رياضة صعبة في الأول ومحتاجة توازن وبراعة في الحركة، ولكن بمجرد أنك تتعلمها (دائماً هايكون في فرصة أنك تحسن مهراتك على الويندسرف أو تتعلم حاجة جديدة.) الإحساس بالإنجاز والحرية مش ممكن تنساه، كمان طريقة التواصل مع الطبيعة والشعور بقوة الرياح وممكن تكون تجربة تأملية ومريحة للنفس.

ممكن تبدأ تتعلمها في أي سن وأي درجة من اللياقة البدنية، كل ما تتقدم فيها كل ما لياقتك البدنية بتتحسن، وتلعب في أي وقت من أوقات السنة، صحيح أن الظروف ممكن تكون أفضل في مواسم معينة بس كده كده ممكن تتعلم وتلعب باستخدام العدة المناسبة واللبس المناسب (زي بدلة الويت سوت في الشتاء)، مثلاً فيه سيدة فرنسية بعد سن الـ40 عدت المحيط الأطلسي والهادي والهندي والبحر المتوسط بويندسرف معدل وكمان فيه مواطن بولاندي بيلعب بقاله 40 سنة وهو الآن عمرة 88!

مراكز تدريب

• دهب:

  • هاري ناس
  • فاناتك
  • ويندرلاند
  • فيتراتوريا

• رأس سدر - مون بيتش

• سوما باي

• مرسى علم

• القاهرة (بعض المدربين بينظموا رحلات لدهب ورأس سدر والأسعار أرخص من المراكز)

  • واتر فيت (كاتبن أحمد هشام)
  • كايروا
  • مدرسة أربع ثواني (كابتن مؤمن معروف)

---

للمزيد من المعلومات

• المجلس الوطني للثقافة والفنون والآداب. أعداد سلسلة عالم المعرفة. Internet Archive.(كتاب ممتاز عن علم الإبحار بالشراع وتاريخة.)
• Jones, Roger, and Ken Windsurfing with Ken Winner. Windsurfing : Basic and Funboard Techniques. San Francisco : Harper & Row, 1985. Internet Archive.
• Winkler, Reinhart. This Is Windsurfing. Boston : Sail Books ; [New York] : Distributed to Bookstores by Norton, 1979. Internet Archive.(كان عند عمي الكتاب ده وأنا صغير قريته 3 أو 4 مرات على أمل أن يوم من الأيام ألعب ويندسرفنج.)
• Welty, Scott. The Why Book of Sailing. Burford Books, 2007.
• Windsurfing in a Warmer World By Jim Titus (مقالة عن تغيير المناخ والويندسرفنج.)
• iWindsurf Forums (منتدى عن الويندسرفنج، مش بنفس نشاط زمان)
• American Windsurfing(جميع أعداد مجلة أمريكان ويندسرفنج)
• Windguru (موقع ممتاز لمعرفة حالة الرياح وتوقعاتها)
• Windsurfing Skills Chart(قائمة مراحل المختلفة في تعلم الويندسرفنج ومستويات المهارة لكل مرحلة.)
• r/Windsrufing منتدى الويندسرفنج على ريدت