في أول يوم أجازة الصيف في 1998 نزلت شارع الحجاز بالمهندسين وفي جيبي 200 جنيه تحويشة حلوة من المصروف وكان ساعتها قلبي بيدق جامد من الحماس، دخلت مكتب شركة أسمها باك PACC (Pan Arab Computer Center) وعملت أول اشتراك بالأنترنت في حياتي، المبلغ كان لشهر واحد بس لأن وقتها ده كان مبلغ مش قليل.

الدخول على الانترنت كان عن طريق المودم ال بيتصل عن طريق التليفون الأرضي على رقم الشركة، المودم ال كان عندي وقتها كان سرعته 14.4Kpbs يعني تقريباً الميجابايت بتنزل في 10 دقائق، وطبعاً دقائق الاتصال بتتحسب على فاتورة التليفون غير الأشتراك المدفوع (لاحظ أن ده قبل الانترنت المجاني 0777).

بعد أنتهاء الشهر، أكتشفت أن حسابي لسه شغال، قعدت شهر وشوية على كده، المهم خفت وبعت لهم رسالة أقول لهم أن الاشتراك خلص والخط لسه شغال وأن أنا مش مسؤول (ما تسألنيش ... كان عندي 17 سنة وقتها). تاني يوم لقيت أعلان في جريدة الأهرام لشركة باك بتعلن عن وظيفة مسؤول نظم يونكس.

لما شفت الإعلان فهمت أن أيامي على الأنترنت معدودة فعملت حاجة مش ولا بد، لما كنت بتتصل بالانترنت على ويندوز 95 كان بيظهر حاجة أسمها Post Dial Terminal Screen ودي عبارة عن شاشة سوداء (سطر أوامر) وفيها سرفر الشركة بيطلب منك أسم المستخدم وكلمة السر، هنا ممكن تكتب أوامر للسرفر، المهم أكتشفت طريقة أني أطلب قائمة بكل المستخدمين المتصلين، وقررت أني أجرب كلمات سر سهلة لكل حساب منهم وفعلاً عرفت أدخل على حساب أسمه ayat بكلمة السر ayat98.

لما حسابي أتقفل بعد الأعلان بيومين، أستخدمت حساب السيدة أيات ثلاثة أشهر لحد ما أتلغى أو أتغيرت كلمة السر، أنا آسف 😞

هذه التدوينة جزء من سلسلة تدوينات تحدي 150x150 — التدوينة 30 من 150