الوضع في ميدان التحرير اليوم
Warning! This post is very old and may contain information or opinions that are no longer valid or embarrassing.
حزين جدا أني لازم أنقل الوضع في التحرير للناس عن طريق المدونة، كان نفسي ناس أكثر تنزل و تشوف لكن الناس معتمده على تويتر والتليفيزيون.
المداخل مقفولة بالسلك الشائك و لكن الأرصفه مفتوحة للمشاه والدراجات العادية والبخارية. حوالين كل مدخل في بتاع 50 واحد أو أكثر داخلين في حوارات، ممكن الحوارات تسخن و يكون في زعيق أو زق. (ما شفتش زق غير على فيديو متصور امس).
الميدان مش مليان و مش فاضي. ممكن نقول أن عدد المتوجدين حوالي 2000 أو أكثر بقليل. منهم معتصمين، باعه جائلين، ناس بضان على موتسيكلات عاوزين يعدوا من الميدان ويطلعوا من الناحية التانية وملهومش دعوة بالأعتصام أو أن في مشاه في الطريق، ناس جيه تشوف الوضع، ناس جاية تقنع المعتصمين أنهم يمشوا و ناس جاية تساند وتدافع عن المعتصمين وصحفيين أجانب قليلين.
ما فيش إذاعة وناس ملمومة عليها زي زمان، الاذاعة الموجودة متكسرة، واحد من المعتصمين قال لي أن الجيش أستهدف تكسير السماعات بالقصد فجر السبت.
في عيادة صغيرة عبارة عن فرشة على الرصيف أمام كنتاكي لمجموعة من الدكاترة قاعدين على أسبتة خضار. كل شوية مجموعة كبيرة من الناس تجري عليهم شايلين شاب، كل اللي شفتهم عندهم أضطراب تحولي (من الآخر مغمى عليهم بسبب الضغط النفسي)
الضغط النفسي هو كل حاجة بيعانوا منها المعتصمين دلوقت، كل شوية يجروا على مدخل علشان في ناس عاوزة تشيل الاسلاك الشائكة أو المتاريس أو ناس عاوزة تضربهم. مانامش منهم حد في الكام يوم اللي فاتوا.
الحوارات الدايرة مع الناس اللي جاية عاوزة تمشيهم وقلة دعم من بقيت الناس والتيارات السياسة ليهم عامله لهم حرب نفسية. ناس تتهمهم أنهم مش شباب 25 يناير وناس تخونهم.
المعتصمين أغلبهم شباب صغير تحت ال30 في منهم في جامعة (و جامعات خاصة) وعمال، بس كتير منهم فقراء. وده سبب أن ناس كتيرة عماله تقول عليهم أشكال بلطجية وأتهامات من هذا القبيل. كأنهم خبراء في علم الفراسة يا خبيتكم.
شافوا الرعب فجر السبت وبالرغم من كدة عندهم من الشجاعة أنهم يكملوا أعتصامهم ويقفوا أمام كل الناس اللي قايمة بالواجب للمجلس العسكري ومطلعة عنيهم حوارات خايبانه، نصها مستفز وطبقي وناس قافله المنطق بتاعها علشان تمشيهم وخلاص، على حسب كلام واحد منهم في ناس بتتفهم وتقتنع وناس مش عاوزه تسمع أصلا.
من الساعة 2 الى 5 ما سمعتش ولا شفت حاجة عن الأجنبي الي التليفيزيون المصري بيقول طعن في أيده.
أعتقد أعتصامهم في الأيام القادمة هايكبر ويكون أكثر شعبية من دلوقت.
Comments
-
karmamole
أنا شفت تكسير السماعات - ده كان شغل الشرطة العسكرية. خدوها عند العمارة اللي على ناصية طلعت حرب و قعدوا يكسروا فيها هناك. ده بعد ما ضربوا و أرهبوا سكان المبنى و بعض العابرين اللي كانوا واقفين في مدخل العمارة شايفين الشرطة العسكرية و الجيش بيهاجم المتظاهرين في طلعت حرب. و كانوا بيهتفوا "الصهاينة اهم!" كل ما كان الجيش و الشرطة العسكرية بيعدوا من قدامهم. لن نرحل و بأذن الله يوم الجمعة نبقى عددنا ضخم بما ان الإتلاف هددوا باعتصام مفتوح علشان أحداث فجر السبت. الثورة الحقيقية بدأت يوم الجمعة - و الجيش لو محققش المطالب مصداقيتة هتتلاشى يوم ورا يوم.
-
karmamole
و رسالة للناس اللي للأسف بيرددوا كلام فاطمة - السبب الرئيسي للإعتصام كان لحماية الضباط. و ممكن نتجادل في ذكاء نزولهم معانا أصلاُ - و انما هو ده كان الأمر الواقع. و هما جم و علشان عددهم كان قليل اتحطت حياتهم في رقبتنا كلنا. اذا كنت انتي تقدري تسيبيهم و تروحي في الظروف دي يبقى اتمنى بس انك تكوني لا تمثلي شريحة كبيرة من الناس - لان ده كان يبقى تصرف جبان و خائن. اتقوا الله ياللي عاملين نفسكم بني ادمين.
-
Mabadawi26
يعني هو ينفع نختلف من غير تخوين وشتيمة......اللي حصل ده كان في غير محله.....كلنا مش عاجبنا فض الاعتصام بالقوة بس كمان مش عاجبنا ان ١٠ ظباط ييجو يتحاموا في مدنيين......و مينفعش نقف ضد الجيش في انه يقبض عليهم.......كلنا عارفين ان الجيش فيه فساد بس مينفعش نطالب بتفكيكه او نساعد على انقلاب دلوقتي.....خليكوا واقعيين كل يوم بتخسروا ارض جديدة و تعاطف الشارع.......السياسة ذكاء وبلاش عواطف دلوقتي.....من حقنا نطالب الجيش انه يفتح تحقيق و لازم بس نقفل الميدان باسلاك شائكة و نعطل الدنيا......ده اللي انا مش فاهماه
-
-
MeshAoklp
الله عليهم شباب نموذج راقي للشجاعه مطلوب مزيد من المعتصمين لدعمهم
-
karmamole
تفوقت على شجاعة عدوي و اخشى الا اتفوق على جبن اشقائي. أتقوا الله في البلد و الشهداء يا ناس. حرام.
-
survival2011
بجد بارك الله فيك
وفعلا حاسه انك اصبت كبد الحقيقه لما قلت معظمهم فقرا عشان كده الناس بتبان انها بلطجيهقبل كده الاعداد كانت بمئات اللوف فالوشوش والهدمه النضيفه كانت بتغطى على منظر الغلابه لما العدد قل بان السواد الاعظم سيد الموقف الفقرا والغلابه -
Hussien_m1
بصراحة مش غايظني غير كل ما مصريين غلابة تتظاهر او تعتصم
يبقوا بلطجية ، لو فيه زي رسمي للمظاهرات يبقي احسن -
moneer klamel
وما رأيك فى الشباب الذى يرتدى تى شرت مكتوب علية بلطجى
-
Pharos_online
اقدر هدف ومغزي الاعتصام لكن اري انه غير موفق وخاصة استمراره بعد مأساة فجر السبت التي تسبب فيها ضباط الجيش المعتصمين واعتقد عن حسن نيه. المهم اتمني من المعتصمين ان يفضوا الاعتصام والصبر الي يوم الجمعة القادم الذي سيكون اكثر من مليونيه واعتقد حينئذ سيعتصم عشرات الالوف في حالة عدم القبض علي جمال وابوه الفاسد. في النهاية يجب ان نتبادل الاراء ونحاول ان نتفق فهذا فقط هو سر قوتنا و قوة ضغطنا علي المجلس لتحقيق كل مطالبنا......وربنا ينصرنا علي كل ظالم ويهدينا الي الطريق السليم ويلهمنا الحكمة
-
anwar
ان كنت فى التحرىر والى حصل دة ظلم الاخوان ومجموعة شادى تامروا خوافا على مصالحه واسالو الى راح وشاف
fatima
وانا اعتقد انهم غلطوا غلطه لا تغتفر...وقلبوا اليوم الجميل الي هو جمعة التطهير والمحاسبه...بغم ونكد علي مصر كلها...وبشماته لأنصار المخلوع...لما يدافعوا عن ضباط مخطئين,,,ويهاجموا الشرطه العسكريه ويعتدوا عليها..يبقي مش متعاطفين معاهم..وده تهديد مروع للثوره وكل مكاسبها
Tamer
خلاص، الضباط اللى ضحوا بحياتهم علشان يقفوا جنب مصر فى محنتها، مايستهالوش ان حد يقف معاهم؟ حتى لو كنا مختلفين معاهم فى الطريقة والرؤية. لكنهم أشجع منى ومنك ومن أى حد لأنهم نزلوا وهم عارفين إن الاحتمال الأكبر إنهم ميرجعوش.
لأ ولا حكاية الاعتداء على الشرطة العسكرية دى كمان، أكيد المتظاهرين كانوا بيضربوهم بالعصى ويكهربوهم بالعصى الكهربائية. ناقص تقولى فيه مصابين وشهداء من الشرطة العسكرية.
حسبى الله ونعم الوكيل،
karmamole
السبب الرئيسي للإعتصام كان لحماية الضباط. و ممكن نتجادل في ذكاء نزولهم معانا أصلاُ - و انما هو ده كان الأمر الواقع. و هما جم و علشان عددهم كان قليل اتحطت حياتهم في رقبتنا كلنا. اذا كنت انتي تقدري تسيبيهم و تروحي في الظروف دي يبقى اتمنى بس انك تكوني لا تمثلي شريحة كبيرة من الناس - لان ده كان يبقى تصرف جبان و خائن. اتقوا الله ياللي عاملين نفسكم بني ادمين