للنباتيين بدائل للحمة كتير لكن غير منتشرة، منها جاهز التحضير كالبرجر النباتي ولحم القمح (السيتان).

لحم القمح مكون في الأساس من جلوتين القمح، وهو غني بالبروتين وله خصائص تشبه اللحوم الحيوانية من ناحية الملمس.

من سنوات عملته من دقيق جميع الأغراض لأن مكانش فيه جلوتين بودرة في السوق. الجلوتين مكون أساسي في دقيق القمح ومش محتاج غير إضافة بهارات (لتحسين الطعم) والماء، من غيره الجلوتين البودرة الجاهز استخلاصه يدوياً بياخد وقت طويل وعلشان كده ماكررتهاش.

من أيام دورت على بودرة القمح، وفعلاً لقيته في محل أكلات صحية قريب والمنتح صناعة محلية ومش غالي.

خلطت 3/4 كوب بودرة جلوتين مع 1/4 كوب دقيق جميع الأغراض مع 3 ملاعق تتبيلة الكفتة مع 2/3 كوب ماء، قطعت العجينة قطع وسويتها على البخار، تسوية أولية، بعد كده شوحت قطعتين مع الزبدة والملح والفلفل على النار وطلعت ممتازة.

بودرة الجلوتين بتسهل عمل لحم القمح جداً وتسويته على البخار بتدي نتائج وطعم أفضل من الوصفات ال بتقترح الغلية.