أهلاً بك عزيزي المغامر متصفح الويب المفتوح، عاوز أحييك على شجاعتك لخروجك من الشبكات الاجتماعية الاحتكارية المغلقة وقرارك أنك تدوس على رابط انترنت، بالرغم من التحذيرات من أنك لو دوست على رابط خارجي مارك زاكربرج مش مسؤول عن ال هايحصل لك.

آنست وشرفت موقعي المغمور، ال هو أيضاً مدونة (فاكر المدونات؟)، هنا مافيش اعلانات ومافيش ملفات ارتباط ولا جافاسكربت يبطء جهازك، ممكن تفتح الموقع بأقدم كمبيوتر تلاقيه حواليك وهايفتح أسرع من مواقع شركات رأس مالها بالمليارات (أنا مجرد هاوي)، ما فيش حاجة هاتسألك لو أنت أنسان وما فيش لافتات منبثقة تطلب منك الموافقة على حاجات مبهمة أوالاشتراك في قائمة بريدية، مش محتاج تعمل حساب أوتدفع فلوس ومافيش تتبع لسلوكياتك ولا بياناتك بتروح لفيسبوك أو جوجل أناليتكس، مافيش محاولة مني لأني أحولك لسبوبة، ما فيش حشو بكلام غير مترابط كاتبه ذكاء اصطناعي علشان أكسب ترتيب النتائج على محركات البحث.

فين مواقع الويب؟ أغلب المبادرات والشركات أهملت مواقعها وأتقوقعت في الفيسبوك وانستاجرام،أو أتحولت لتطبيقات بتبيع بياناتك وتبطئ تليفونك، فين مواقعكم الشخصية؟ ليه الويب البسيط المفتوح صعب؟

هذه التدوينة جزء من سلسلة تدوينات تحدي 150x150 — التدوينة 20 من 150