ما عندناش في البيت طبق استقبال القنوات التلفزيونية الفضائية (أو ما يعرف بالدِش 📡) ومكتفين بنتفلكس ويوتيوب وبلكس، لكن قبل الأولمبياد كنا عاوزين نعرف لو فيه خدمة ما على الأنترنت ينفع نشترك فيها علشان نتفرج على المسابقات المختلفة في الأولمبياد السنة دي.

رحنا أحد المراكز التجارية الكبيرة علشان نشترك في بي إن سبورتس لمدة شهر لكن للأسف أكتشفنا أننا لازم يكون عندنا دِش ونشتري جهاز مخصوص ثمنه خمسة ألاف جنيه ونشترك سنة كاملة بأربعة ألاف جنيه!!! علشان نتفرج على ثلاث أسابيع من الأولمبياد، وطبعاً ده عرض غير مقبول تماماً لأننا مش مهتمين بكرة القدم أو أي فعاليات رياضية تانية بتحصل طول السنة (بنتفرج على ملخصات سباق الدراجات تور دو فرانس كل سنة على يوتيوب بس كده)، طبعاً أحبطنا جداً أن العرض غير مناسب لنا.

قعدت أفكر لو الحل أن الواحد يشترك في VPN ويشترك مع أحد الخدمات الأجنبية ال بتعرض الأولمبياد في أوروبا أو أمريكا بس المشكلة هي أننا لازم نجيب راوتر ينفع يدخل على VPN و كمان العقبة التانية هي حجب الدولة لبروتوكولات الـ VPN وده بيخلي الخدمة غير مضمونة تماماً.

المهم قلت أدخل على موقع الأولمبياد الرسمي وأشوف لو عندهم شرح أزاي الواحد يتفرج على الأولمبياد في بلده وهنا كان مكتوب أن بي أن سبوتس هي ال عندها حق إذاعة الفعاليات في المنطقة ورابط لتطبيق بي أن على متجر جوجل، ضغط على الرابط ونزلت تطبيق بي أن سبورتس ال طلب من الرقم التسلسلي لجهاز الاستقبال بتاعهم ال ب5000 جنيه، لكن لما كنت بنزل التطبيق لمحت أيقونة تطبيق تاني أسمه TOD وكان مكتوب تحته أنه من تطوير شركة بي أن سبورتس!

TOD

هنا أفتركت لوحة إعلانية على طريق الواحات كانت عن TOD وأنه حاجة زي واتش إت أو نتفلكس، نزلت TOD وقعدت أتصفح كل حاجة عنه لأني كنت خايف أن يكون فيه خدعة ما، لكن بعد إحساسي أنه مش نصب، أشتركت لمدة شهر بـ 11 دولار وعملت تنبيه على مفكرتي قبل أنتهاء الشهر بكام يوم علشان ألغي الإشتراك لأنه مصمم أنه يعيد تجديد الإشتراك تلقائياً (حركة حقيرة من شركات كتيرة).

المهم بعدها بيومين كان الافتتاح وفعلاً التطبيق ذاع الحفل على الهواء، وكان حفل الافتتاح فيه لحظات مبهرة كتيرة وكان يستاهل أن الواحد يسهر للساعة واحدة صباحاً، لكن التطبيق فيه عيوب كتيرة في خاصية إذاعة البث على جهاز جوجل كروم كاست، والتطبيق أقل جودة من نيتفليكس بس أهه قام بالواجب.

أتفرجنا على

• قوس وسهم للسيدات والرجال 🏹 - كوريا سيدات ورجال مبهرين جداً لكن كنا بنشجع فريق المكسيك النسائي، و فريقي الرجال التركي عمل شغل حلو.
• جمباز سيدات 🤸‍♀️
• سباحة رجال 🏊‍♂️
• ركمجة رجال 🏄 - الأمواج في تاهيتي مرعبة 🌊
• تزلج على اللوح سيدات ورجال 🛹 - ومش فاهمين ليه المتسابقات السيدات أطفال عندهم 14 إلى 16 سنة لكن الرجال أكبر بكتير في العمر.
• سباق الدراجات الجبلية رجال 🚵‍♂️ - وكان سباق رهيب خصوصا لما بيدكوك البريطاني سبق كوريتسكي الفرنسي بحركة عنيفة شوية، لكن فرحنا بفوز هاثرلي الجنوب أفريقي بالميدالية البرونزية.

لسه عاوزين نفترج على الويندسرفرنج بس لسبب ما لم يظهر بث رياضات الشراع على TOD اليوم مش فاهم ليه!

أزاي بتابعوا الأولمبياد وهل فيه رياضات (غير كرة القدم) بتابعوها؟

هذه التدوينة جزء من سلسلة تدوينات تحدي 150x150 — التدوينة 45 من 150