أتكلمت قبل كده عن التطوير المتسارع للطرق والكباري في مصر، الموضوع مش جديد، ناس كتيرة أتكلمت عن ده، لكن عاوز أقف عند طريق أفزعني، وصلة بطول 6 كيلومتر ما بين الطريق الدائري وطريق الواحات بغرب القاهرة، على شمال غرب الطريق كومباوند ماونتن فيو وملاهي دريم بارك وعلى جنوب شرق الطريق حدائق الأهرام. رابط لمكان الطريق على خرائط جوجل.

في السنة ال فاتت تمت توسعة الطريق، وأصبح عرض الطريق في حدود 40 إلى 42 متر في الأتجاه الواحد! (باستخدام أداة قياس المسافات على خرائط جوجل وخرائط بنج).

وأنا سايق على الطريق حسيت أن ده يمكن يكون أوسع طريق مشيت عليه في حياتي، الطريق واسع بشكل عبثي أنا مش قادر أفهم ليه وسعوه كده، طريق مصر الأسكندرية الصحراوي بعد آخر تجديدات عرضه 18.3 متر بحسب موقع رئاسة الجمهورية، الطريق الدائري في أوسع مناطق له 30 متر، طريق I-405 (أزحم طريق سريع في جنوب كاليفورنيا) عرضه 20 متر.

🚗 محاولة تانية لإستيعاب مقاسات الطريق: لو أعتبرنا أن حارة الطريق 3.7 متر (بحسب المعايير الأمريكية) فالطريق تقريباً 11 حارة، بعد البحث على الأنترنت شوية لقيت أن مهندسين الطرق (الأمريكان برضو) بيعتبروا أن معدل تدفق حركة المرور الأمثل 1900 سيارة لكل حارة في الساعة، يعني ناحية واحدة من الطريق ممكن تسمح لمرور 20,900 سيارة في الساعة الواحدة! طبعاً ده مستحيل عملياً لأن فيه عنق زجاجة في نهايات الطريق لأنه بيتصل بطرق 4أو 5 حارات فقط، يبقى ليه أتوسع كده؟

✈️ محاولة تالتة لشرح حجم الطريق: بحسب مواصفات إدارة الطياران الفيدرالية عرض الطريق المهولة دي تسمح بطائرات بوينج 737-700 أو أيرباص A-320 أنها تستخدم الطريق كمهبط، دي طائرات مش صغيرة، طائرات تستوعب 149 راكب ومداها المسافة بين القاهرة وسنغافورة.

🚸 محاولة رابعة لشرح حجم الطريق: لو فيه شخص حظة السيء أجبره على عبور الطريق ده هايخد منه 52 ثانية مشي (لو هو شاب صحته كويسة وبيسمع الكلام ال أتعلمه في أبتدائي أنه يعدي الطريق مشي مش جري) ولأن السرعة على الطريق رسمياً 80 كم في الساعة، لازم يتأكد أن الطريق فاضي على مسافة 1,144 متر قبل ما يعدي (لو بالليل أو فيه ضباب أو منحنيات في الطريق يبقى يعدي وهو بيلعب روليت روسي).

💀 طبعاً مع التطور ده كله ما فيش أهتمام حقيقي بالأمان على الطرق أو محاولة لتحسين سلوكيات السائقين، مثلاً ما فيش تخطيط للحارات على الأرض، والسيارات بتجري بأسرع من السرعات المقررة بشكل مرعب وكل ما الطرق بتوسع كل ما السائقين بيعملوا غرز (الملاكي قبل الأجرة) ولو فيه عنق زجاجة ما بيصدقوا يزاحموا بعض على المخارج.

أنا مش مهندس طرق أو خبير مرور لكن أنا ملاحظ أن طرق كتيرة جديدة أوسع من الاحتياج والدليل على ده أن في بعض الأحيان الرمال بتتكوم وتغطي جوانب الطريق لأن السيارات مش محتاجة العرض ده كله، هل ده تصميم مدروس لإحتياجات سائقي السيارات؟ ولا معتبرين أن أعداد السيارات ستستمر في الزيادة في المستقبل بالرغم من المشاريع العملاقة للنقل الجماعي زي المونوريل والأوتوبيس الترددي؟

هو ده المستقبل؟ 🤔

من معرفتي المحدودة للطريق الخزعبلي ده قبل التطوير هو أنه عمره ما كان زحمة أو واقف، يمكن لأني مش ساكن في أكتوبر ما أعرفش لكن مثلاً طريق الواحات هو ال بيكون فيه بعض الأماكن زحمة، فهل فعلاً الوصلة دي تحتاج أنها تبقى من أوسع الطرق في مصر؟ ولا هي توسعة من أجل التوسعة وخلاص؟ هل عرض 40 متر هو مستقبل الطريق الدائري في السنوات القادمة؟ مين بيدرس الحاجات دي وأيه المعايير بتاعتها هنا؟ أيه الحد الأقصى في القانون لعرض الطرق السريعة؟ تكلفة الحارات الزيادة كام؟